Ажлын байр тухгүй санагдахад заавал шинэ ширээ, сандал авах шаардлагатай байдаггүй. Заримдаа сандлын өндрийг хэдхэн сантиметр өөрчлөх, дэлгэцээ зөв байрлуулах эсвэл байнга ашигладаг зүйлсээ ойртуулахад л өдөр тутмын тав тух мэдэгдэхүйц сайжирдаг.
Хамгийн чухал нь ажлын байрыг өөртөө тохируулах. Хүн бүрийн өндөр, биеийн хэмжээ, ажиллах хэв маяг өөр учраас нэг тохиргоо бүгдэд тохирохгүй.
1. Сандлын өндрөөс эхэл
Сандал дээр суухад хөл шалан дээр бүтнээрээ хүрч, өвдөг ойролцоогоор 90 градусын өнцөгтэй байх нь тохиромжтой.
Хэрэв сандал хэт өндөр байвал хөл унжиж, гуяны доод хэсэгт даралт үүснэ. Хэт нам байвал өвдөг өндөрсөж, нуруу болон ташаанд ачаалал нэмэгдэнэ.
Зөв тохируулахын тулд:
- хөлөө шалан дээр бүтэн тавих
- өвдөг, ташааны өндрийг ойролцоо байлгах
- мөрөө суллах
- тохойгоо ширээн дээр тавихад мөр өргөгдөхгүй байх
гэсэн энгийн зүйлсийг шалгаарай.
Хэрэв ширээ өндөр бөгөөд сандлаа өндөрлөх шаардлагатай бол хөлийн тавиур ашиглах нь илүү тухтай.
2. Нурууны түшлэгээ ашигла
Эргономик сандалтай мөртлөө түшлэгээсээ урагш сууж ажилладаг хүн олон байдаг.
Сандлын түшлэг нурууг дэмжих зориулалттай учраас биеэ хэт урагш бөхийлгөхгүй, нуруугаа түшлэгт ойр байлгах хэрэгтэй.
Бүсэлхийн дэмжлэг нь нурууны доод хэсгийн байгалийн хотгор хэсэгт таарч байвал хамгийн тохиромжтой.
Гэхдээ хэт хатуу, хүчтэй тулгах шаардлагагүй. Гол нь нуруу өөрөө байрлалаа барих гэж байнга хүч гаргахгүй байх юм.
3. Дэлгэцээ хэт нам бүү байрлуул
Laptop эсвэл дэлгэц хэт нам байвал хүн өөрийн мэдэлгүй толгойгоо доош бөхийлгөж эхэлдэг.
Дэлгэцийн дээд хэсгийг нүдний түвшинтэй ойролцоо байлгаж, дэлгэцийг шууд урдаа байрлуулах нь илүү тохиромжтой.
Дэлгэцээ хажуу тийш байрлуулбал өдөржин хүзүүгээ нэг тал руу эргүүлэх шаардлагатай болдог.
Laptop удаан хугацаагаар ашигладаг бол:
- laptop stand
- тусдаа keyboard
- mouse
ашиглахад ажлын байрны байрлалыг илүү зөв тохируулах боломжтой.
4. Дэлгэцийн зайг өөртөө тохируул
Дэлгэц хэт ойр байвал нүдэнд ачаалал өгнө. Хэт хол байвал хүн өөрийн мэдэлгүй урагш тонгойж эхэлдэг.
Ерөнхийдөө гараа урагш сунгахад хүрэх орчим зайд дэлгэц байрлах нь ихэнх хүнд тохиромжтой.
Гэхдээ дэлгэцийн хэмжээ, хараа, ашиглаж буй программ зэргээс шалтгаалан энэ зай өөр байж болно.
Гол шалгуур нь энгийн:
Текст уншихын тулд урагш тонгойх шаардлагагүй байх.
5. Байнга ашигладаг зүйлсээ ойр байрлуул
Ажлын ширээг бүхэлд нь ашиглах шаардлагагүй.
Keyboard, mouse, утас, тэмдэглэлийн дэвтэр зэрэг байнга хэрэглэдэг зүйлсээ гарын үндсэн хүрэх бүсэд байрлуулах нь илүү зөв.
Ховор ашигладаг зүйлсийг арай хол байрлуулж болно.
Ингэснээр өдөрт хэдэн зуун удаа:
- гараа хэт сунгах
- биеэ мушгих
- сандлаасаа хазайх
хөдөлгөөн багасна.
Жижиг мэт боловч давтагддаг хөдөлгөөнүүд удаан хугацаанд тав тухад их нөлөөлдөг.
6. Keyboard болон mouse-аа хэт хол бүү тавь
Keyboard хэт хол байвал хүн гараа сунгаж, мөрөө урагш түлхсэн байрлалтай болдог.
Тохойгоо биедээ ойр, мөрөө сул байлгаж болохоор keyboard болон mouse-аа байрлуулаарай.
Mouse-аа keyboard-аас хэт хол тавихгүй байх нь мөн чухал.
Хэрэв ажилдаа mouse их ашигладаг бол жижиг хөдөлгөөн хийхэд хангалттай зай үлдээгээд, гараа байнга хол сунгах шаардлагагүй байрлал сонгох хэрэгтэй.
7. Ширээн доорх зайг чөлөөтэй байлга
Ширээн доор хайрцаг, цүнх, компьютерийн төхөөрөмж болон бусад зүйл их байвал хөлөө хөдөлгөх боломж багасдаг.
Ажиллахдаа хөлөө үе үе хөдөлгөж, байрлалаа өөрчлөх боломжтой байх хэрэгтэй.
Тиймээс ширээн доорх хэсгийг хадгалалтын газар болгохоос илүү хөл чөлөөтэй хөдөлгөх орон зай гэж харах нь зөв.
8. Нэг байрлалдаа удаан суухгүй байх нь хамгийн чухал
“Зөв суух байрлал” гэж нэг байрлалд бүтэн өдөр суух нь өөрөө сайн зүйл биш.
Хамгийн зөв байрлал бол байнга өөрчлөгдөж байдаг байрлал.
Өдрийн турш:
- сандлын налалтаа өөрчлөх
- босож алхах
- утсаар ярихдаа босох
- богино уулзалтыг зогсоогоор хийх
- өндөр тохируулгатай ширээтэй бол сууж, зогсож ээлжлэх
зэрэг жижиг хөдөлгөөнүүдийг хэвшүүлэх нь илүү үр дүнтэй.
9. Ажлын ширээгээ хэт дүүргэх хэрэггүй
Том ширээ заавал илүү тухтай гэсэн үг биш.
Ажлын гадаргуу хэрэггүй зүйлсээр дүүрэх тусам хэрэглэж болох бодит зай багасч, шаардлагатай зүйлээ олоход ч төвөгтэй болдог.
Өдөр бүр ашигладаг зүйлсээ л ширээн дээр үлдээж, бусдыг:
- тумбо
- шүүгээ
- тавиур
зэрэг хадгалалтын хэсэгт байрлуулах нь ажлын орчныг илүү цэвэр, тайван болгоно.
10. Гэрэл болон дэлгэцийн ойлтыг шалга
Дэлгэцийн ард эсвэл яг урд хүчтэй цонх байвал нүд амархан ядардаг.
Дэлгэц дээр гэрэл шууд ойхгүй, байгалийн гэрэл хажуугаас тусахаар байрлуулах нь илүү тохиромжтой.
Хэрэв цонхны байрлалыг өөрчлөх боломжгүй бол:
- дэлгэцийн өнцөг
- хөшиг
- нэмэлт ажлын гэрэл
ашиглан тохируулж болно.
Ажлын байрны 1 минутын шалгалт
Өөрийн ажлын байрыг хараад дараах асуултуудыг шалгаарай.
- Хөл шалан дээр бүтнээрээ хүрч байна уу?
- Мөр сул байна уу?
- Нуруу түшлэгтэй хүрч байна уу?
- Дэлгэц рүү харахын тулд толгойгоо доош бөхийлгөж байна уу?
- Keyboard, mouse ашиглахдаа гараа хэт сунгаж байна уу?
- Ширээн доор хөлөө чөлөөтэй хөдөлгөж чадаж байна уу?
- Өдрийн турш байрлалаа өөрчлөх боломж байна уу?
Хэрэв аль нэгэнд нь “үгүй” гэж хариулж байвал шинэ тавилга худалдаж авахаасаа өмнө одоо байгаа ажлын байраа бага зэрэг өөрчлөөд үзээрэй.
Тав тухтай ажлын байр жижиг зүйлээс эхэлдэг
Эргономик гэдэг нь заавал үнэтэй сандал эсвэл өндөр тохируулгатай ширээ гэсэн үг биш.
Өөрийн биед тохирсон байрлал, зөв тавьсан дэлгэц, хүрэхэд хялбар хэрэгслүүд, өдөрт хангалттай хөдөлгөөн — эдгээр жижиг зүйл нийлээд ажлын байрыг илүү тухтай болгодог.
Харин шинэ оффис төлөвлөж байгаа бол эдгээрийг тавилга сонгохоос эхлээд тооцох нь дараа нь засахаас хамаагүй хялбар.